+(374) 237 23034 | [email protected]
«Արմավիրի զարգացման կենտրոն» հասարակական կազմակերպության «Արմավիր ինֆոտուն»-ը իր ՀաՄաՏեղ ծրագրի շրջանակներում մեկնարկել է մասնագիտական կողմնորոշման օնլայն հանդիպումների շարքը:
Այն նախատեսված է ապագա ուսանողների և մասնագիտություն ընտրելու դժվարություններ ունեցող անձանց համար:
Առաջին հանդիպման թեման հոգեբանությունն էր, որը կայացավ մայիսի 1-ին:
«Ժեստ» հոգեբանական կենտրոնի հոգեբան Անի Ապիտոնյանը ներկայացավ «Հոգեբանի գործունեությունը և գործառույթները. hոգեբանի դերը հասարակությունում» թեմայով:
Հոգեբանական աշխատանքի դժվարությունների հաղթահարման մասին խոսելիս նա նշեց կարևոր հանգամանքներ՝ վստահության դաշտի ստեղծում, այցելուի գանգատի լսում, ինչպես նաև նրա կյանքի միջավայրի, ընտանիքի, գենետիկ հիվանդությունների և այլ տեղեկությունների ձեռքբերում, հոգեբանական թեստերի միջոցով հետազոտություն, որոնց հիման վրա էլ կառուցվում է ողջ հոգեբանական աշխատանքը:
Այս ամբողջական տեղեկատվությունը ունենալու դեպքում է մասնագիտական աշխատանքը դառնում առավել արդյունավետ:
Հոգեբանների մոտ շատ կարևոր սկզբունք է մարդկանց անձնական գաղտնիքը հարգելը: Այն ամենակարևոր հանգամանքն է վստահություն ձեռք բերելու համար, քանի որ միայն այդ դեպքում այցելուն կարող է իր խնդիրների մասին անկեղծ խոսել, դա նաև մարդու իրավունքների պաշտպանությունն է հոգեբանի կողմից:
Հաճախ սկսնակների մոտ վախ է առաջանում, որ իրենց աշխատանքը կարող է արդյունք չունենալ:
Սա առաջանում է անձնային և մասնագիտական անվստահությունից, ինչը նշանակում է, որ, հնարավոր է, տագնապային անձնավորության հատկանիշներ ունենա անձը:
Այս ամենը հաղթահարվում է մասնագիտական աճի և փորձի հետ: Կարևոր է նաև կամավորական աշխատանքը, երբ հսկում են, ուղղություն են ցույց տալիս, որի արդյունքում է սկսնակն ունենում մասնագիտական աճ:
Իհարկե մեծ դեր ունի նաև գիտելիքների բազան, որի կուտակման հնարավորություններն այսօր շատ են: Գործնական դասընթացները հնարավորություն են տալիս հասկանալ կոնկրետ իրավիճանում մասնագիտական քայլերը: Կարևոր է նաև գործնական հոգեբանի մոտ այցելությունը: Նա կարող է օգնել՝ բացահայտելու վախերի պատճառները, աշխատելու դրանց հաղթահարման ուղղությամբ:
Անի Ապիտոնյանը անդրադարձավ նաև մասնագիտական աճին:
Կարևոր է նպատակադրումը, մասնագիտական նպատակների հստակեցումը:
Հոգեբաններին նույնպես անհրաժեշտ է անձնային թերապիա, որով զբաղվում են սուպերվայզերները: Նրանք օգնում են պրակտիկ հոգեբաներին հասկանալ սեփական ապրումները, խնդիրները, դիրքորոշումները, որպեսզի դրանք չխառնեն այցելուների դիրքորոշումներին և չպնդեն, որ այն նրանցն է: Բացի այդ, կարևոր է, որ հոգեբանը ժամանակի ընթացքում իր այցելուների խնդիրները չընկալի որպես իրենն ու դրանով իր վիճակն էլ չբարդացնի:
Ստացվում է, որ մասնագիտական աճին աջակցում են սուպերվայզերները: Հայաստանում քիչ են նրանք: Սուպերվայզերը այն հոգեբանն է, ով տասնհինգ և ավելի տարիներ անդադար պրակտիկ հոգեբանությամբ է զբաղվել: Բացի այդ նա պետք է ունենա 500 ժամ և ավելի անձնային թերապիա, սուպերվեզիա: Պետք է աշխատած լինի հոգեբանության տարբեր ուղղություններով, քանի որ մեկ այցելուի հետ հոգեբանն աշխատում է տարբեր ուղղություններով՝ սա կախված առանձնահատկությունից: Սուպերվայզերը նաև պետք է աշխատած լինի տարբեր խնդիրներ ունեցող անձանց հետ:
Մասնակիցներից մեկին հետաքրքրրեց՝ արդյո՞ք հոգեբանը իրավունք ունի աշխատելու հոգեբուժական խնդիրներ ունեցող մարդու հետ: Անի Ապիտոնյանը պատասխանեց, որ այն պետք է իրականացվի միայն հոգեբույժի հետ համագործակցելով:
Պրակտիկայում լինում են դեպքեր, երբ այցելուն խուսափում է հոգեբույժից, իսկ հոգեբանն էլ նկատում է, որ նրա մոտ կա հոգեբուժական կամ սահմանային խնդիր, այդ դեպքում պետք է ուղղորդում կատարի: Հաճախ լինում է, որ այցելուները չեն պատկերացնում իրենց խնդիրը և հրաժարվում են այդ ուղորդումից: Հոգեբանի դերն այստեղ այն է, որ նա շարունակի աշխատել այնքան,մինչև անձը ցանկանա այցելել հոգեբույժին:
Դրանից հետո, ախտորոշման համաձայն, կատարվում է աշխատանքը: Շատ կարևոր է, որ մասնագետը գիտակցի, թե ինչ խնդիրների հետ չի կարող աշխատել և ժամանակին հրաժարվի:
Սուպերվայզերը հոգեբաններին զինում է նաև անհրաժեշտ գիտելիքներով, պրակտիկ գործիքներով:
Որպես հանդիպման ամփոփում՝ Անի Ապիտոնյանը մասնակիցների համար կիրառեց հոգեբանական թեստ, որը որոշում է մարդու նպատակաուղվածությունը: Նա խորհուրդ տվեց հստակեցնել նպատակները և ձգտել թե՜ անձնային, թե՜ մասնագիտական աճի:
«Հանրային մասնակցություն տեղական ինքնակառավարմանը» (ՀաՄաՏեղ) ծրագրի նպատակն է բարձրացնել հանրային մասնակցության աստիճանը ապակենտրոնացման և տեղական ինքնակառավարման բարեփոխումներում: Ծրագիրը քաղաքացիներին տրամադրում է վստահելի տեղեկատվություն և հզորացնում քաղաքացիական հասարակությանը` արդյունավետ, հաշվետու և մասնակցային տեղական ինքնակառավարումը խթանելու նպատակով:
Ծրագիրն իրականացվում է Համայնքների ֆինանսիստների միավորման (ՀՖՄ) կողմից՝ Տեղեկատվական համակարգերի զարգացման և վերապատրաստման կենտրոնի (ՏՀԶԿԿ), Երևանի մամուլի ակումբի (ԵՄԱ), Ժուռնալիստների «Ասպարեզ» ակումբի, Եվրասիա համագործակցություն հիմնադրամի (ԵՀՀ) և Հետազոտական ռեսուրսների կովկասյան կենտրոնի (ՀՌԿԿ) հետ համատեղ, և ֆինանսավորվում է Միացյալ Նահանգների Միջազգային զարգացման գործակալության կողմից:
