+(374) 237 23034 | [email protected]
Սեպտեմբերի 16-17-ը երիտասարդական կազմակերպությունների 25 ներկայացուցիչներ Հայաստանի Հանրապետության բոլորի մարզերից հանդիպել էին Աղվերանում՝ մասնակցելու երիտասարդական կազմակերպությունների կարողությունների զարգացման ծրագրին, որը նպատակ ուներ աջակցել երիտասարդական ծրագրերի մշակման և իրականացման գործում ներգրավված կազմակերպություններին։ Միջոցառմանը մասնակցում էին երիտասարդական կազմակերպությունների ներկայացուցիչներ, ովքեր ցանկանում էին խորացնել իրենց գիտելիքները և հմտությունները երիտասարդական ծրագրեր մշակելու և իրականացնելու տարբեր թեմաների շուրջ։
Թեմաները, որոնք քննարկվել էին ծրագրի ընթացքում, հետևյալն էին՝
- Կազմակերպական զարգացում և կառավարում՝ ներառյալ ռազմավարական պլանավորում, կարիքների գնահատում, ռեսուրսների քարտեզագրում, ինչպես նաև երկարաժամկետ և կարճաժամկետ նպատակների սահմանում։
- Շահագրգիռ կողմերի քարտեզագրում՝ երիտասարդական ծրագրերի հաջող իրականացման համար։
- Ֆոնդահայթայթում և առաջարկների կազմում՝ ներառյալ ծրագրերի հստակ և հակիրճ նկարագրություններն ու իրատեսական բյուջեների մշակում։
- ֆինանսական կառավարում, ներառյալ համապատասխան օրենսդրությունն ու կանոնակարգերը
- Հանրային հաղորդակցություն և լրատվամիջոցների հետ կապեր, սոցիալական մեդիայի և թվային հարթակների արդյունավետ օգտագործում երիտասարդական ծրագրերի համար
- Երիտասարդական ծրագրերի իրականացում, մշտադիտարկում և հաշվետվություն։
Կարծիքներ մասնակիցներից.
«Ծրագրի բոլոր բաղադրիչները կիրառելի են, օրինակ՝ ինչպես կարելի է ճիշտ քայլերով եւ թիրախային երիտասարդական ծրագրեր մշակել, բյուջե կազմել, ինչպես իրականացնել այդ ծրագրերը, կազմել հաշվետվություններ, ինչ առավելություններ ունեն հկ-ները ֆինանսական դաշտում, ինչ կանոնակարգեր կան, ինչպես իրականացնել հանրային հաղորդակցությունը, եւ այլն։ Կային բազմաթիվ մանրամասներ, որ նախկինում հաշվի չէինք առնում եւ տեղյակ չէինք»
«Ստացված գիտելիքների հիման վրա կարող եմ ուղղորդել իմ կազմակերպությանը՝ իրականցնել ավելի արդյունավետ ռազմավարական պլանավորում, կարող եմ մշակել ավելի որակյալ ծրագրային առաջարկներ, կազմել բյուջեներ և մշտադիտարկման պլաններ»
«․․․կբարելավվենք մեր կազմակերպության ծրագրերի մշակման թիմի գիտելիքներն ու կարողությունները, առավել արդյունավետ ֆոնդահայթհայթման համար»
Այսպիսի կարողությունների զարգացման ծրագրերը կարևոր են մի քանի պատճառներով: Օրինակ՝
- դրանք նպաստում են երիտասարդական կազմակերպությունների հզորացմանը, ինչը նրանց թույլ է տալիս մշակել և իրականացնել ավելի արդյունավետ և կառուցվածքային ծրագրեր՝ համայնքների շահերին ծառայելու համար:
- ունենում ենք կայուն զարգացում, քանի որ ռազմավարական պլանավորման, ռեսուրսների քարտեզագրման և ֆինանսական կառավարման վերապատրաստման միջոցով կազմակերպություններն ավելի լավ են պատրաստված երկարաժամկետ կայունության ապահովման համար, ինչը երաշխավորում է, որ նրանք կկարողանան շարունակել աջակցել երիտասարդներին:
- ծրագրերի մշակման և իրականացման բարելավում է տեղի ունենում։ Իմանալով, թե ինչպես սահմանել իրատեսական նպատակներ, մշտադիտարկել առաջընթացը և արդյունավետ հաղորդակցվել շահագրգիռ կողմերի հետ, կազմակերպությունները կարող են մշակել ծրագրեր, որոնք իրատեսական են և ցանկալի արդյունքներ ունեն։
- Ֆոնդահայթայթման և ծրագրային առաջարկների կազմման հմտությունների շնորհիվ կազմակերպությունները կարող են ձեռք բերել ֆինանսական միջոցներ՝ ընդլայնելու իրենց գործունեությունը և աջակցելու ավելի լայն նախաձեռնությունների:
- Լրատվամիջոցների հետ աշխատանքի և սոցիալական մեդիայի օգտագործման վերապատրաստումը օգնում է կազմակերպություններին ունենալ արդյունավետ հանրային հաղորդակցություն, բարձրացնել իրազեկությունը, պաշտպանել երիտասարդական խնդիրները և ներգրավել ավելի լայն լսարան, ինչը մեծացնում է նրանց ազդեցությունը:
Ընդհանուր առմամբ, այս ծրագիրը օգնեց ամրապնդել երիտասարդական կազմակերպությունների կարողությունները՝ թույլ տալով նրանց ավելի արդյունավետ գործել, ապահովել անհրաժեշտ ֆինանսավորում և իրականացնել այնպիսի ծրագրեր, որոնք դրական ազդեցություն կունենան համայնքների վրա։
Սույն միջոցառումը իրականացվել է Գերմանիայի կառավարության և Եվրոպական միության ֆինանսական աջակցությամբ՝ «Քաղաքացիական հասարակության հզորացում Արևելյան գործընկերության երկրներում» ծրագրի ներքո գործող «ԵՄ-ն հանուն երիտասարդների․ Երիտասարդների ներգրավում և հզորացում» ծրագրի շրջանակներում Գերմանական միջազգային համագործակցության ընկերության (GIZ) և Արմավիրի զարգացման կենտրոնի կողմից:
